好耐冇寫野,今日番工醒起香港回歸(7月1號)原來都關我地公司事,即係聽日放假!!所以就即刻乜x都唔做,等放假!
點知原來一下子停落唻,會悶x到抽筋,所以上唻寫下野,扮下有型!

最近都冇乜野好講,因為真係冇乜特別野,
之前同一個好耐冇見ge中學同學食飯,佢問我,"最近點呀?",
面對住呢個當大家都冇話題時就會出現既終極典型問題,可能大家都會本能反射咁回應一句,"咪又係咁"
但我覺得其實呢句"咪又係咁",基本上係等於冇講過野,因為呢個回答其實係冇答過任何野,哈哈!!
所以我今次冇採用呢種典型回答,而選擇左扮有型,同佢講,"我係度感受緊生活既穩定!"
我地兩個都相視而笑,原來大家都進行緊同一樣野,無錯,係穩定而且規律ge生活!

回望番岩岩出唻做野哥段時間,哥時好有沖勁,哥團火熊熊聲,邊個行埋唻都會燒親,充滿左理想同埋希望.
咁難道我而家團火熄左?己經人到中年?諗緊退休? 當然唔係!只係我明白到猛火同慢火ge分別!

初出芧蘆,認為nothing is impossible,只要肯做肯去實踐,夢想可成真,
冇錯!!呢d口號,句句都係堅野!!但係佢冇話俾你聽,入面包含住一個好重要ge因素,就係時間!
你今日抱住呢d諗法,努力不懈,充滿鬥心,但係可能1年或2年或3年後都未見到結果,你可能就會開始質疑自己係咪傻仔,
如果呢個時候突然有個你好尊敬ge人,同你講,"咪x再傻落去la",
好大可能,你之後就會成為左下一個勸人咪x傻ge人.

其實,我認為對理想或者夢想,再或者係幻想ge追求,一定要係細水長流,
真正ge熱情,其實係一種長時間ge投入,而且會係樂在其中,
我從來冇忘記過自己想實現ge野,我團火都仲著緊,只係由燒柴改左用gas爐,可以隨意控制大小,
然後再黙黙等待